ရင်းနှီးမြှုပ်နှံသူများ၏ ရှုထောင့်မှမြင်သော ကော်ပိုရိတ်စီမံအုပ်ချုပ်မှုဆိုင်ရာ အွန်လိုင်းဆွေးနွေးပွဲ

၂၀၂၀ ခုနှစ်၊ ဩဂုတ်လ ၁၂ ရက်

အွန်လိုင်းဆွေးနွေးပွဲအကြောင်း

လွန်ခဲ့သော နှစ်ပေါင်းနှစ်ဆယ်အတွင်း ကမ္ဘာအနှံ့အပြားရှိ မူဝါဒချမှတ်သူများ၊ ဥပဒေကြပ်မတ်ရေး အရာရှိများနှင့် ဈေးကွက်တွင်ပါဝင်သူများသည် ကောင်းမွန်သော ကော်ပိုရိတ်စီမံအုပ်ချုပ်မှုဆိုင်ရာ မူဝါဒများနှင့် စီမံဆောင်ရွက်ချက်များကို ရေးဆွဲချမှတ်ရန် လိုအပ်မှုအပေါ် ပိုမိုအသားပေး ဆောင်ရွက်လာ ကြသည်။ လက်တွေ့မျက်မြင်ကို အခြေခံသည့် အထောက်အထားများ ပိုမိုများပြားလာခြင်းက ကောင်းမွန်သော ကော်ပိုရိတ်စီမံအုပ်ချုပ်မှုသည် ယှဉ်ပြိုင်မှုကို ပံ့ပိုးပေး၍ ကော်ပိုရိတ်အား အရင်းအနှီး ဈေးကွက်များကို လက်လှမ်းမီရရှိစေသည်ကို ပြသနေသောကြောင့် ၎င်းသည် ဘဏ္ဍာရေးဈေးကွက်များ ကို ဖွံ့ဖြိုးစေ၍ စီးပွားရေးတိုးတက်စေရန် လှုံ့ဆော်ရာတွင် ကူညီပေးပါသည်။ ယနေ့ခေတ်တွင် ပြည်တွင်းပြည်ပမှ ရင်းနှီးမြှုပ်နှံသူများသည် ကုမ္ပဏီများ၏ လည်ပတ်ပုံနှင့် ၎င်းတို့၏ လိုအပ်ချက်နှင့် တောင်းဆိုမှုများအပေါ် တုံ့ပြန်ဆောင်ရွက်ပုံတို့အပေါ် အမြဲပိုမိုဂရုပြုလေ့ရှိပါသည်။ ရင်းနှီးမြှုပ်နှံသူများ သည် ဘုတ်အဖွဲ့က ကောင်းမွန်သောအလေ့အထများအတိုင်း လိုက်နာဆောင်ရွက်သည့်အပြင် သတင်းအချက်အလက်ထုတ်ဖော်မှုနှင့် ဘဏ္ဍာရေးဆိုင်ရာ ပွင့်လင်းမြင်သာမှုတို့ရှိစေရန် ပံ့ပိုးပေးပြီး ရှယ်ယာရှင်များ၏ အခွင့်အရေးများကို လေးစားသည့် ကောင်းမွန်စွာ စီမံအုပ်ချုပ်သော ကုမ္ပဏီများတွင် ပိုမိုရင်းနှီးမြှုပ်နှံလိုသောဆန္ဒ ပိုမိုရှိလာပါသည်။ ကောင်းမွန်စွာ စီမံအုပ်ချုပ်သော ကုမ္ပဏီများသည်လည်း  ၎င်းတို့၏ စီးပွားရေး၊ ပတ်ဝန်းကျင်နှင့် လူမှုရေးဆိုင်ရာ တာဝန်ဝတ္တရားများကို ဖြည့်ဆည်းဆောင်ရွက်ပြီး စဉ်ဆက်မပြတ် ကြီးပွားတိုးတက်မှုကို ပံ့ပိုးပေးရန်အတွက် ပိုမိုဆောင်ရွက်နိုင်ပါသည်။

ရင်းနှီးမြှုပ်နှံသူများ၏ ရှုထောင့်မှမြင်သည့် ကော်ပိုရိတ်စီမံအုပ်ချုပ်မှုဆိုင်ရာ အွန်လိုင်းဆွေးနွေးပွဲသည် ပါဝင်တက်ရောက်သူများအား အောက်ပါကဏ္ဍများတွင် အကူအညီပေးမည်ဖြစ်သည်။

• ရင်းနှီးမြှုပ်နှံသူများ၏ ကော်ပိုရိတ်စီမံအုပ်ချုပ်မှုဆိုင်ရာ မျှော်မှန်းချက်များနှင့် ၎င်းတို့သည် မြန်မာကုမ္ပဏီများအတွက် အဘယ်ကြောင့်အရေးပါသည်ကို ဆွေးနွေးခြင်း။
• ကုမ္ပဏီများ၏ စီမံအုပ်ချုပ်မှုအပိုင်းနှင့်စပ်လျဉ်း၍ ရင်းနှီးမြှုပ်နှံသူများ၏ လိုအပ်ချက်များနှင့်အညီ ဒါရိုက်တာများနှင့် အလုပ်အမှုဆောင်များကို လမ်းညွှန်မှုများပေးခြင်း။
• ကော်ပိုရိတ်စီမံအုပ်ချုပ်မှုဆိုင်ရာ စံချိန်စံညွှန်းများကို မည်သို့အကောင်အထည်ဖော်ချမှတ်မည်နှင့် စပ်လျဉ်း၍ လက်တွေ့ကျသော သာဓကများပေးခြင်း။