မစ္စတာမယ်လ်ဗင်ပန်သည် Yoma Strategic ၏ အလုပ်အမှုဆောင်အရာရှိချုပ်နှင့် အမှုဆောင်ဒါရိုက်တာ ဖြစ်ပါသည်။ မစ်ဆူဘီရှီကော်ပိုရေးရှင်း၊ IFC၊ ADB၊ Yum! Brands၊ ပါ့ခ်ဆန်၊ နယူးဟော်လန်၊ JCB၊ Dulwich နိုင်ငံတကာကောလိပ်နှင့် ကိုကူဘူတို့ အပါအဝင် အဓိကကျသော အဖွဲ့အစည်းများနှင့် Yoma အုပ်စုအကြား ဆက်ဆံရေးတည်ဆောက်ရာတွင် ထဲထဲဝင်ဝင် ပါဝင်လျက်ရှိသည်။

ယခင်က သူသည် ဟောင်ကောင်ရှိ Goldman Sachs တွင် စီမံခန့်ခွဲရေးဒါရိုက်တာ၊ Asia Ex-Japan Corporate Solutions Group ၏ ခေါင်းဆောင်အဖြစ် ၁၂ နှစ်ကြာ လုပ်ကိုင်ခဲ့သည်။ တရုတ်ပြည်သူ့သမ္မတနိုင်ငံ၊ အရှေ့တောင်အာရှနှင့် ကိုရီးယား စသည့် အာရှစျေးကွက်အများအပြားတွင် ကျယ်ပြန့်နက်ရှိုင်းသော ဘဏ္ဍာရေးနှင့် ကော်ပိုရိတ်ဆိုင်ရာ အတွေ့အကြုံများရှိပြီး ဝန်ဆောင်မှုသုံးစွဲသူများကို ဘဏ္ဍာငွေရှာဖွေမှု၊ ရင်းနှီးမြှုပ်နှံမှုနှင့် ဆုံးရှုံးမှုအန္တရာယ်လျှော့ချရေး ဆောင်ရွက်ချက်များနှင့်ပတ်သက်၍ အကူအညီပေးလျက်ရှိပါသည်။

ဦးအောင်ဇော်နိုင်သည် MIoD ၏ ဒါရိုက်တာများဘုတ်အဖွဲ့ ဥက္ကဋ္ဌ ဖြစ်ပါသည်။ သူသည် ရွှေတောင်အုပ်စု၏ အုပ်စုအမှုဆောင်အရာရှိချုပ်ဖြစ်ပြီး ကုမ္ပဏီ၏ မဟာဗျူဟာမြောက် လမ်းကြောင်း ချမှတ်ခြင်းနှင့် ယင်းအား အကောင်အထည်ဖော် ဆောင်ရွက်မှု စွမ်းဆောင်ချက်အား ကြီးကြပ်ကွပ်ကဲခြင်းတို့ကို တာဝန်ယူရပါသည်။ ယခုလက်ရှိရာထူးကို တာဝန်မယူမီတွင် ရွှေတောင်၌ အဓိကရာထူးအများအပြားကို ထမ်းဆောင်ခဲ့သည်။ သူ၏ခေါင်းဆောင်မှုအောက်တွင် ရွှေတောင်အုပ်စုသည် ဘီလူးချောင်း အမှတ် (၃) ရေအားလျှပ်စစ်စက်ရုံ၊ မြန်မာ့အသံနှင့် ရုပ်မြင်သံကြား အဆောက်အဦ၊ ၂၀၁၄ ခုနှစ် ASEAN ညီလာခံကျင်းပခဲ့သော ၆၀,၀၀၀ စတုရန်းမီတာ အကျယ်ရှိသည့် ပတ္တမြားခန်းမ၊ ထို့နောက် ရန်ကုန်မြို့လယ်ခေါင်တွင် ၂၆၀,၀၀၀ စတုရန်းမီတာ အကျယ်ရှိပြီး ကမ္ဘာ့အဆင့်မီဆောက်လုပ်ထားသည့် အဆောက်အဦသစ်ဖြစ်သော ဂျန်းရှင်းစီးတီး အပါအဝင် မြန်မာနိုင်ငံတွင် အကြီးမားဆုံးနှင့် အခက်ခဲဆုံးသော စီမံကိန်းအချို့ကို ပြီးမြောက်အောင် ဆောင်ရွက် နိုင်ခဲ့သည်။ သူသည် အာမခံလုပ်ငန်း၊ ဘဏ္ဍာရေးနှင့် စားသောက်ကုန်နှင့် အဖျော်ယမကာလုပ်ငန်းကဲ့သို့သော စီးပွားရေးနယ်ပယ်အသစ်များဆီသို့ ဝင်ရောက်ရာတွင်လည်း ရွှေတောင်အုပ်စုကို ဦးဆောင်ခဲ့ပါသည်။

ဦးအောင်ဇော်နိုင်သည် အားကစားဝန်ကြီးဌာနလက်အောက်ရှိ မြန်မာ့ကိုယ်ခံပညာအဖွဲ့ချုပ်၏ ဥက္ကဋ္ဌအဖြစ်လည်း ထမ်းဆောင်ခဲ့သည်။ ၂၀၁၃ ခုနှစ် ၂၇ ကြိမ်မြောက် အရှေ့တောင်အာရှအားကစားပြိုင်ပွဲတွင် အဖွဲ့ချုပ်သည် ထူးကဲသော အောင်မြင်မှုရရှိကာ ရွှေတံဆိပ် ၉ ဆုကို မြန်မာနိုင်ငံအတွက် ဆွတ်ခူးပေးခဲ့ပါသည်။